Ngleluri Kabudayan Jawa _Religius lan Tansah Nuju Karyenak Tyasing Sasami

Ngleluri Kabudayan Jawa

Religius lan Tansah Nuju Karyenak Tyasing Sasami

            Yen diringkes adhedhasar andharanesawenwh budayawan jawa, sutresna budaya jawa lan nimpuna babagan kabudayan jawa, manungsa sadurunge nindakake pakaryan tansah nengenake eling karo sing gawe urip. Sipat iki mujudake ciri ngluhurake Gusti Allah Kang Akarya Jagad. Bab iki kang diarani sipat religious. Lan yen ing jaman modern iki religiositas ana sing kawengku tradhisi lan agama.

            Kabeh cipta, rasa lan karsa, uga kabeh sikep utawa sipat, wicara tumindake manungsa tansah sumendhe marang panguasane Gusti Allah. Babagan iki kawujud ing paradigm urip mamayu hayuning bawana. Ciri liyane, manungsa tansah ngedohi cocongkrahan sing asipat pribadi, katutup utawa tinarbuka, kejaba yen panci ditantang. Manungsa kuwi luwih milih ngalah lan ngalih. Lagi ngamuk yen wis kadhesek temen-temen. Kanthi mangkono manungsa kuei ing cara mikire tansah nengenake bedhamen lan rasa tentrem.

            Manungsa uga tansah nengenake bebuden luhur sing beblese ing wujud kesusilaan lan tata karma. Ing urip padinan, ing kulawarga apa dene ing bebrayan agung manungsa ora seneng rame-rame. Tegese, apa sing ditindakake sawenehing pawongan ora prelu kawruhan dening wong akeh. Tanpa kawruhan, kabeh tumindake pawongan mau bakal dilakoni kanthi mantep.

            Ing babagan batin,manungsa kuwi tansah nengenake laku, lagi ilmu. Tegese, wong urip kuwi kudu nengenake tumindak, laku, utawa praktik tinimbang wicara utawa wacana. Saka, rerangkene laku, manungsa bakal nggayuh ilm. Sikep utawa sipat batin kang mangkene iki uga kasengkuyung dening cara mikir sing asipat momot.

            Lelandhesan sikep momot kamot utawa akomodatif iki manungsa gampang srawung karo budaya liya lan ora gigrig nalika weruh asil budaya liya. Kepara manungsa kuwi bisa nampa samubarang kang anyar saka budaya liya. Mung wae kabudayan mau samengkone tetep bakal dipilah lan dipilih endikang murakabi tumrap urip lan panguripane. Kanthi momot kamot, manungsa ngiras pantes nambah kawruh anyar.

            Cara mikir lan sikep batin kaya mangkene iki bisa tinemu ing kabeh perangane bebrayan agung ing ngendi wae. Emane, ing wektu-wektu pungkasan iki, nalika saperangan gedhe pawongan akeh sing kayungyun marang budaya global lan nganggep budaya jawa kuwi jadul, ndadekake cara mikir lan sikep batin mau dadi sok-sok kesilep, nanging tetep ana.

            Ing jaman globalisasi iki, miturutku piwulang luhur sing madhahi cara mikire wong jawa kuwi malah jumbuh banget karo kaanan saiki. Lire, swasana urip ing sarwa materialistis, mubra-mubra, sarwa kesusu lan sapituture iki bisa dikendhalani kanthi cara mikire wong jawa. Tekaku mrene, mandeg pagelaran Wayang Wong Sriwedari, ing sela-selaku silaturahmi karo sedulur sing isih dedunung ing Sukoharjo, uga kanthi pangajab kanggo ndhudhah kawicaksanan warisan leluhur, ya leluhurku sing jawa kuwi.